ᒪᓕᒐᐃᑦ ᐱᐅᓯᐅᒋᐊᓕᓐᓄᑦ
ᓇᓗᓇᐃᔭᐃᓂᖅ
ᑲᑎᒪᔨᓄᑦ ᐃᖅᑲᓇᐃᔭᖅᑎᓄᓪᓗ ᐱᐅᓯᐅᒋᐊᓕᓐᓄᑦ ᒪᓕᒐᐃᑦ ᐊᑐᐃᓐᓇᐅᑎᑦᓯᔪᑦ ᐃᓘᓐᓈᒍᑦ ᖃᐅᔨᒪᓕᑕᕐᓂᒃ ᐱᐅᓯᕆᒋᐊᓕᖏᓐᓂᒃ ᑲᑎᒪᔨᖏᑦᑕ ᐃᖅᑲᓇᐃᔭᖅᑎᖏᑦᑕᓗ ᓄᓇᕗᒻᒥ ᐱᕙᓪᓕᐊᑎᑦᓯᕐᓂᒧᑦ ᑯᐊᐳᕇᓴᒃᑯᑦ ᑎᒥᖁᑎᖏᑦᑕᓗ.
ᓄᓇᕗᒻᒥ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕇᓴᒃᑯᑦ, ᐃᓕᑕᖅᓯᓯᒪᓪᓗᑎᒃ ᑭᓐᖒᒪᒋᔭᐅᔪᓂᒃ ᐃᑲᔪᖅᓯᒍᑎᑦᓴᓂᒃ ᐊᑐᐃᓐᓇᐅᑎᑦᓯᓂᕐᒧᑦ ᑐᑭᓕᐅᖅᓯᒪᑦᓯᐊᖅᑐᒥᒃ ᑎᑭᐅᒪᔭᕆᐊᓕᓐᓅᖓᔪᓄᑦ ᐱᓇᓱᐊᕐᓂᕐᒥ ᐱᐅᓯᖃᕐᓂᕐᒧᑦ ᐊᒻᒪᓗ ᖃᐅᔨᒪᓕᑕᐃᑦ ᐊᐳᖅᓯᒪᓂᕐᒧᑦ, ᑯᐊᐳᕇᓴᒃᑯᑦ, ᓴᖅᑮᓯᒪᔪᑦ ᐊᓪᓚᑎᒻᒪᕆᖓᓐᓂᒃ ᑎᒥᐅᔫᑉ ᐱᐅᓯᐅᒋᐊᓕᓐᓅᖓᔪᓄᑦ ᐅᖃᐅᔾᔨᒋᐊᖅᑎᐅᓂᐊᖅᑎᓪᓗᒍ.
ᑎᒥᐅᔪᒧᑦ ᐊᓪᓚᑎᒻᒪᕆᒃ, ᐱᐅᓯᐅᒋᐊᓕᓐᓄᑦ ᒪᓕᒐᕐᓄᑦ ᐅᖃᐅᔾᔨᒋᐊᖅᑎᐅᓗᓂ, ᐊᖓᔪᖅᑳᖃᖅᑐᖅ ᑯᐊᐳᕇᓴᒃᑯᑦ ᑲᑎᒪᔨᖏᓐᓂᒃ ᐅᖃᐅᔾᔨᒋᐊᖅᐸᑦᓱᓂ ᖃᐅᔨᒪᓂᒻᒪᕆᒃᑯᑦ ᑲᑎᒪᔨᓂᒃ ᐃᖅᑲᓇᐃᔭᖅᑎᓂᓪᓗ ᐱᐅᓯᐅᒋᐊᓕᓐᓄᑦ ᒪᓕᒐᕐᓄᑦ ᐊᐳᖅᓯᒪᓂᕐᒨᖓᔪᓂᓪᓗ ᐊᑑᑎᑐᐃᓐᓇᕆᐊᓕᒻᒥᓂᒃ ᑲᔪᓯᑎᑦᓯᑦᓱᑎᒃ ᐊᑐᓂᑦ ᑎᒍᒥᐊᖅᑕᒥᓂᒃ.
ᑲᓲᒪᓂᓪᓗᐊᑕᖓᑦ ᑲᑎᒪᔩᑦ ᐊᒻᒪᓗ/ᐅᕝᕙᓗ ᐃᖅᑲᓇᐃᔭᖅᑏᑦ ᐊᒻᒪᓗ ᓄᓇᕗᒻᒥ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕇᓴᒃᑯᑦ ᓱᓕᔪᕐᓇᑦᓯᐊᕆᐊᓖᑦ; ᐊᑦᑐᐊᓂᖃᖅᑐᖅ ᓱᓕᔪᕐᓇᕐᓂᕐᒧᑦ ᑐᓂᒪᓂᐅᔪᑦ ᓱᓕᓂᕐᒧᑦ ᒪᑐᐃᖔᓂᕐᒧᓪᓗ.
ᒪᓕᓐᓂᖅ ᒪᓕᒐᕐᒥᒃ
ᓄᓇᕗᒻᒥ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕇᓴᒃᑯᑦ ᑲᑎᒪᔨᖏᑦ ᐃᖅᑲᓇᐃᔭᖅᑎᖏᓪᓗ ᒪᓕᓐᓂᐊᖅᑐᑦ ᐊᑑᑎᔪᓕᒫᓂᒃ ᐊᕕᑦᑐᖅᓯᒪᔪᓂ, ᐊᕕᑦᑐᖅᓯᒪᔪᕐᔪᐊᓂ, ᐊᒻᒪᓗ ᒐᕙᒪᑐᖃᒃᑯᑦ ᒪᓕᒐᖏᓐᓂᒃ ᐊᕕᑦᑐᖅᓯᒪᓂᐅᔪᓂᒃ ᑯᐊᐳᕇᓴᒃᑯᑦ ᐊᐅᓚᑕᖏᓐᓂ.
ᑭᓇᑐᐃᓐᓇᖅ ᓄᓇᕗ ᒥ ᐱᕙᓪᓕᐊᑎᑦᓯᕐᓂᒧᑦ ᑯᐊᐳᕇᓴᒃᑯᓐᓂ ᖃᐅᔨᒪᓯᓐᓇᕐᓗᓂ ᐊᑑᑎᓂᐊᓐᖏᑦᑐᖅ ᒪᓕᒐᕐᓂᒃ ᓯᖁᒥᑦᓯᔪᓂᒃ ᐅᕝᕙᓗ ᑎᓕᓯᓗᓂ ᐃᖅᑲᓇᐃᔭᖅᑎᐅᖃᑎᒥᓂᒃ, ᑲᑐᔾᔨᖃᑎᒥᓂ ᐋᑦᑐᓛᑦᑎᐅᖃᑎᒥᓂᓪᓘᓐᓃᑦ ᑕᐃᒪᐃᖁᔨᓗᓂ.
ᐃᖅᑲᓇᐃᔭᖅᑏᑦ ᓂᕆᐅᒋᔭᐅᔪᑦ ᐃᓕᒻᒪᓐᓂᐅᒐᔭᕆᐊᖏᑦ ᓇᐅᑐᐃᓐᓇᕐᓂᒃ ᒪᓕᒐᖅᔪᐊᓂᒃ ᐊᑑᓯᔪᓂᒃ ᐃᖅᑲᓇᐃᔮᒥᓐᓄᑦ, ᐃᓕᑕᖅᓯᒍᓐᓇᕐᓗᑎᒃ ᐃᖅᑲᖅᑐᖅᑕᐅᔾᔪᑎᒋᑐᐃᓐᓇᕆᐊᓕᒻᒥᓂᒃ ᖃᖓᒃᑯᓪᓗ ᒪᓕᒐᓕᕆᔨᒥᒃ ᑐᑭᓯᒋᐊᕋᔭᕆᐊᑦᓴᒻ. ᖁᓚᕈᕕᑦ, ᑐᑭᓯᒋᐊᒃᑲᓐᓂᕆᑦ ᓄᓇᕗᒻᒥ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕆᓴᒃᑯᑦ ᒪᓕᒐᓕᕆᔨᖓᓐᓂᒃ.
ᓇᐅᑐᐃᓐᓇᖅ ᑲᑎᒪᔨ ᐃᖅᑲᓇᐃᔭᖅᑎᓘᓐᓃᑦ ᓴᖅᑮᖏᐊᖃᓐᖏᖅᑐᖅ ᑲᒪᓐᖏᓯᖅᑐᕆᐊᖃᕋᓂᓗ ᓱᓕᓐᖏᑦᑐᓂᒃ ᑎᑎᕋᖅᓯᒪᔪᓂᒃ. ᓇᐅᑐᐃᓐᓇᖅ ᑲᑎᒪᔨ ᐃᖅᑲᓇᐃᔭᖅᑎᓘᓐᓃᑦ ᓱᕋᑦᑎᕆᒋᐊᖃᓐᖏᑦᑐᖅ ᑲᒪᓐᖏᓯᖅᑐᕆᐊᖃᕋᓂᓗ ᓱᕋᑦᑎᕆᓂᕐᒥᒃ ᑎᑎᕋᖅᓯᒪᔪᓂᒃ ᐋᒡᒐᐅᒐᓗᐊᖅ ᑐᓐᖓᕕᖃᕐᓗᑎᒃ ᑯᐊᐳᕇᓴᒃᑯᑦ ᐊᑐᐊᒐᖏᓐᓂ.
ᑲᑎᒪᔩᑦ ᐃᖅᑲᓇᐃᔭᖅᑏᓪᓗ ᐃᓚᐅᑎᕆᐊᓐᖃᖏᑦᑐᑦ ᑕᑯᑦᓴᐅᔪᒃᓘᓐᓃᑦ ᐃᓚᐅᑎᖅᑑᔮᕆᐊᖃᓐᖏᑦᑐᑦ ᒪᓕᒐᕐᓂᒃ ᓯᖁᒥᑦᓯᔪᓄᑦ ᑕᐃᒫᖑᓐᖏᑦᑐᕐᓗ ᐊᐅᓚᓂᐅᔪᒧᑦ ᓯᖁᒥᑦᓯᔪᓄᑦ.
ᐊᐳᖅᓯᒪᓂᖅ
ᑲᑎᒪᔩᑦ ᐃᖅᑲᓇᐃᔭᖅᑏᓪᓗ ᑲᒪᓂᐊᖅᑐᑦ ᑲᒪᒋᒋᐊᓕᒻᒥᓂᒃ ᐃᑉᐱᒍᓱᑦᓯᐊᕐᓗᑎᒃ ᐃᒻᒥᓂᓪᓗ ᐱᔪᒪᔭᕆᔭᓂ ᐊᒻᒪᓗ ᐱᔪᒪᔭᕆᔭᐅᔪᑦ ᓄᓇᕗᒻᒥ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕇᓴᒃᑯᓐᓄᑦ ᐊᐳᖅᓯᒪᒋᐊᖏᑦ ᐅᔾᔨᖅᑐᕐᓗᓂ ᑕᑯᓐᓇᖅᑕᐅᑐᐃᓐᓇᕆᐊᖃᕆᐊᖏᑦ.
ᑲᑎᒪᔨ ᐃᖅᑲᓇᐃᔭᖅᑎᓘᓐᓃᑦ ᐊᐳᖅᓯᒪᓂᖃᓪᓚᕆᑉᐳᖅ ᑲᑎᒪᔨ ᐃᖅᑲᓇᐃᔭᖅᑎᓘᓐᓃᑦ ᑲᒪᒋᒋᐊᓕᒻᒥᓂᒃ ᑲᒪᓗᓂ ᐊᐅᓚᓂᐅᔪᒥᓪᓘᓐᓃᑦ ᐃᖅᑲᓇᐃᔮᒥᓂ ᑲᒪᒋᓗᒍ ᑲᒪᒋᒋᐊᓕᓂ ᓯᕗᕙᕆᐊᕈᑎᒋᒍᓐᓇᕈᓂᐅ ᓇᒻᒥᓂᖅ ᐱᔪᒪᔭᕆᔭᒥᓄᑦ.
ᒐᕙᒪᒃᑯᑦ ᓄᓇᕗᒻᒥ ᐊᐳᖅᓯᒪᓂᕐᒧᑦ ᒪᓕᒐᖅᔪᐊᖓ ᐊᑑᑎᔪᖅ ᓄᓇᕗᒻᒥ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕇᓴᒃᑯᓐᓄᑦ, ᑎᒥᖁᑎᖏᓐᓄᑦ, ᐊᕕᑦᑐᖅᓯᒪᓂᖏᓐᓄᓪᓗ.
ᓇᓗᓇᓐᖏᑦᑐᖅ ᐊᐳᖅᓯᒪᓂᖅᑕᓕᒃ ᑐᓴᐅᒪᑦᓯᐊᖅᑐᖅ ᐃᓄᒃ ᑕᑯᓐᓇᖁᓐᓇᖅᐸᑦ ᑲᑎᒪᔨᐅᑉ ᐃᖅᑲᓇᐃᔭᖅᑎᐅᓪᓘᓐᓃᑦ ᐃᖅᑲᓇᐃᔭᕈᓐᓇᕐᓂᖓ ᐊᐅᓚᓂᖃᕈᓐᓇᕐᓂᖓᓘᓐᓃᑦ ᐃᖅᑲᓇᐃᔮᒥᓂ ᐊᑦᑐᖅᑕᐅᓯᒪᑉᐸᑦ ᐊᑦᑐᖅᑕᐅᓂᐊᖅᐸᓪᓘᓐᓃᑦ ᑲᑎᒪᔨᐅᑉ ᐃᖅᑲᓇᐃᔭᖅᑎᐅᓪᓘᓐᓃᑦ ᓇᒻᒥᓂᖅ ᐱᔪᒪᔭᕆᔭᖏᓐᓂᒃ.
ᐃᓘᓐᓇᑦᓯᐊᑎᒃ ᑲᑎᒪᔩᑦ ᐃᖅᑲᓇᐃᔭᖅᑏᓪᓗ ᐊᑑᑎᑦᑕᐃᓕᒪᒋᐊᓖᑦ ᐊᐳᖅᓯᒪᓂᖅᑕᖃᖅᑎᓪᓗᒍ ᐅᕝᕙᓗ ᐊᐳᖅᓯᒪᓂᖅᑕᖃᑐᐃᓐᓇᕆᐊᖃᖅᑎᓪᓗᒍ ᐅᓚᕕᑐᐃᓐᓇᕆᐊᓕᒻᒥᒃ ᑕᑯᓐᓇᖅᑕᐅᑐᐃᓐᓇᕆᐊᓕᒻᒥᓘᓐᓃᑦ ᐅᓚᕕᒋᐊᖓ ᐃᖅᑲᓇᐃᔭᖅᑎᐅᑉ ᑲᑎᒪᔨᐅᓪᓘᓐᓃᑦ ᖃᓄᖅᑑᕈᓐᓇ ᓂᖓᓂᒃ ᓄᓇᕗᒻᒥ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕇᓴᒃᑯᑦ ᐱᔪᒪᔭᕆᔭᖏᓐᓂᒃ.
ᐃᓘᓐᓇᑎᒃ ᑲᑎᒪᔩᑦ ᐃᖅᑲᓇᐃᔭᖅᑏᓪᓗ ᖃᐅᔨᒃᑲᐃᓂᐊᖅᑐᑦ ᖃᓄᐃᓕᖓᓂᕐᒥᓂᒃ ᐊᐳᖅᓯᒪᓂᖅᑕᖃᓪᓚᕆᑦᑎᓪᓗᒍ. ᖃᐅᔨᒃᑲᓂᖃᕐᓗᓂ, ᑲᑎᒪᔨᐅᒍᓂ, ᐃᑦᓯᕙᐅᑕᖓᓐᓄᑦ ᑯᐊᐳᕇᓴᒃᑯᑦ, ᐃᖅᑲᓇᐃᔭᖅᑎᐅᒍᓂ, ᑯᐊᐳᕇᓴᒃᑯᑦ ᐊᓪᓚᑎᒻᒪᕆᖓᓐᓄᑦ.
ᐃᓚᖏᑦ ᐊᐳᖅᓯᒪᓂᐅᔪᑦ ᑕᑯᑦᓴᐅᑦᓯᐊᖅᑐᑦ, ᑭᓯᐊᓂᑦᑕᐅᖅ ᐊᓯᖏᑦ ᐊᓚᒡᒐᐃᓗᐊᓐᖏᑦᑐᑦ. ᓄᓇᕗᒻᒥ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕇᓴᒃᑯᑦ ᐃᓕᑕᖅᓯᓯᒪᔪᑦ ᑲᑎᒪᔩᑦ ᐃᖅᑲᓇᐃᔭᖅᑏᓪᓗ ᐊᑑᑎᓪᓚᕆᑦᑐᓂᒃ ᓯᓚᑖᓂ ᐱᔪᒪᔭᕆᔭᖃᖅᑐᑦ; ᑭᓯᐊᓂᓕ, ᐃᓚᖏᓐᓂᒃ ᑕᑯᓐᓇᖅᑕᐅᔪᖃᑐᐃᓐᓇᕆᐊᖃᕐᒥᒻᒪᑦ ᐊᐳᖅᓯᒪᓂᐅᒋᐊᖏᑦ ᑕᐃᒪᐃᒐᓱᐊᕐᓯᒪᖏᑦᓯᐊᕋᓗᐊᖅᑎᓪᓗᒋᑦ ᑲᒪᒋᔭᖏᑦ ᐃᖅᑲᓇᐃᔭᖅᑎᐅᑉ ᑲᑎᒪᔨᐅᓪᓘᓐᓃᑦ.
ᐅᑯᐊ ᐱᖓᓱᑦ ᐆᑦᑑᑕᐅᔪᑦ ᖃᓄᐃᓕᖓᓂᐅᔪᓂᒃ ᑲᑎᒪᔨᐅᑉ ᐃᖅᑲᓇᐃᔭᖅᑎᐅᓪᓘᓐᓃᑦ ᓇᒻᒥᓂᖅ ᐱᔪᒪᔭᕆᔭᖏᑦ ᐊᐳᖅᓯᒪᓂᖃᑐᐃᓐᓇᕆᐊᓖᑦ ᓄᓇᕗᒻᒥ ᐱᕙᓪᓕᐊᑎᑦᓯᕐᓂᒧᑦ ᑯᐊᐳᕇᓴᒃᑯᓐᓄᑦ:
- ᐃᖅᑲᓇᐃᔭᖅᑎ ᑎᒍᒥᐊᖅᑐᖅ ᑐᓂᓯᓂᕐᒥᒃ ᑳᑦᑐᓛᒻᒥᒃ ᑲᑐᔾᔨᖃᑕᐅᑉᐸᑦ ᑎᒥᐅᔪᒧᑦ ᐊᑭᑦᑐᕋᐅᑎᖃᑕᐅᔪᒧᑦ.
- ᐃᖅᑲᓇᐃᔭᖅᑎ ᑎᒍᒥᐊᖅᑐᖅ ᐃᖅᑲᓇᐃᔭᖅᑎᑖᕐᓂᕐᒧᑦ ᐃᓚᒋᔭᐅᑉᐸᑦ ᓇᒻᒥᓂᕆᔭᖓ ᐃᓚᖓ ᐱᒐᓱᐊᖅᓱᓂ ᐃᖅᑲᓇᐃᔮᒥᒃ.
- ᑲᑎᒪᔨ ᖃᐅᔨᒪᑦᓯᐊᖅᑐᖅ ᐊᓚᒡᒐᐃᑦᑐᐹᓗᒻᒥᒃ ᑮᓇᐅᔭᓕᐅᕋᓱᐊᓂᕐᒧᑦ ᑐᑦᓯᕋᐅᑎᓂᒃ ᐊᑯᕐᖓᓐᓂ ᓄᓇᕗᒻᒥ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕇᓴᒃᑯᑦ ᐊᒻᒪᓗ ᓄᓇᕗᒻᒥ ᑲᒻᐸᓂᐅᔪᖅ ᓇᒻᒥᓂᕐᓗ ᑮᓇᐅᔭᓕᐅᕈᑎᖃᕋᓱᐊᓕᕐᓗᓂ ᑐᓴᖅᑕᐅᓚᐅᖅᑎᓐᓇᒍ ᑮᓇᐅᔭᓕᐅᕋᓱᐊᕈᑎᑦᓴᖅ ᐃᓄᓐᓄᑦ.
ᑲᑎᒪᔩᑦ ᐃᖅᑲᓇᐃᔭᖅᑏᓪᓘᓐᓃᑦ ᐊᐳᖅᓯᒪᓂᕐᒦᑦᑐᑦ ᖃᐅᔨᒃᑲᐃᒋᐊᓖᑦ ᐊᐳᖅᓯᒪᓂᕐᒥᓂᒃ ᓂᕈᐊᑦᑕᐃᓕᓗᑎᓪᓗ ᐅᕝᕙᓗ ᐊᓯᖏᓐᓂᒃ ᐊᐅᓚᔾᔭᒋᐊᕈᑎᓂᒃ ᐊᑦᑐᐃᓂᖃᕐᓂᐊᖅᑐᓂᒃ ᖃᓄᐃᓕᖓᓂᖓᓂ ᐊᐅᓚᓂᐅᔫᑉ ᐱᓇᓱᐊᕐᓂᒃᑯᓪᓘᓐᓃᑦ ᐊᐅᓪᓛᖅᑑᑉ. ᐊᑕᖏᖅᑐᓂᒃ ᖃᐅᔨᒃᑲᐃᓂᖅᑕᖃᖅᐸᑦ ᐱᕕᖃᕈᑎᒋᒻᒪᔾᔪᑎᒃ ᑲᑎᒪᔩᑦ ᐃᖅᑲᓇᐃᔭᖅᑏᓪᓗ ᐋᖅᑭᒋᐊᕆᓗᑎᒃ ᑐᑭᓯᓇᕈᓐᓃᖅᓯᒪᔪᓂᒃ ᐱᕕᖃᕈᑕᐅᑦᓱᓂᓗ ᓴᒃᑯᐃᓂᕐᒥᒃ ᐅᕝᕙᓗ ᑲᒪᒋᐊᑦᓯᐊᕐᓂᕐᒥᒃ ᐊᐳᖅᓯᒪᓂᐅᔪᓂᒃ ᐱᔭᕆᐊᑦᑐᓚᐅᓐᖏᓐᓂᖓᓂ.
ᑕᐃᒪᐃᑦᓴᕆᐊᖃᖅᑐᐊᖅᐸᑦ, ᐃᖅᑲᓇᐃᔭᖅᑎ ᑲᑎᒪᔨᓘᓐᓃᑦ ᐅᖃᐅᓯᖃᕈᓐᓇᖅᑐᖅ ᐃᒻᒥᒃᑰᑦ ᐊᑑᑎᔪᒥᒃ ᓄᓇᕗᒻᒥ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕇᓴᒃᑯᑦ ᐱᐅᓯᐅᒋᐊᓕᓐᓄᑦ ᐅᖃᐅᔾᔨᒋᐊᖅᑎᒧᑦ ᐃᓱᒪᓕᐅᕆᓐᓇᖅᓱᓂᓗ ᐊᐅᓚᔾᔭᒋᐊᕈᑕᐅᒋᐊᓕᓐᓂᒃ ᐊᐳᖅᓯᒪᓂᕐᒨᖓᔪᓄᑦ.
ᐅᑯᐊ ᑭᖑᓂᖓᓃᑦᑐᑦ ᐊᑐᐃᓐᓇᐅᑎᑦᓯᒍᑕᐅᔪᑦ ᓇᓗᓇᐃᔭᖅᓯᒪᑦᓯᐊᖅᑐᓂᒃ ᐅᖃᖃᑎᒌᓐᓂᐅᔪᓂᒃ ᐊᐳᖅᓯᒪᓂᖅᑕᖃᑐᐃᓐᓇᕆᐊᖃᖅᑎᓪᓗᒍ ᖃᓄᕐᓗ ᓄᓇᕗᒻᒥ ᐱᕙᓪᓕᐊᑎᑦᓯᕐᓂᒧᑦ ᑯᐊᐳᕇᓴᒃᑯᑦ ᓂᕆᐅᒻᒪᖔᑕ ᑲᑎᒪᔨᖁᑎᖏᑦ ᐃᖅᑲᓇᐃᔭᖅᑎᖁᑎᖏᒋᓪᓗ ᐱᐅᓯᖃᕐᓂᐊᕐᒪᖔᑕ.
ᓯᓚᑖᓂ ᐱᓇᓱᐊᕐᓂᕐᒨᖓᔪᑦ
“ᐱᓇᓱᐊᕐᓂᕐᒧᑦ ᐊᐅᓚᓂᐅᔪᖅ” ᐅᖃᐅᓯᓕᒃ ᓇᒻᒥᓂᖃᕐᓂᕐᒥᒃ, ᐃᓚᐅᑎᓐᓂᕐᒥᒃ ᖃᓄᖅᑑᕈᑕᐅᓂᖏᓐᓂᒃ ᑲᑎᒪᔨᐅᓪᓗᓂ, ᐅᕝᕙᓗ ᐃᓚᐅᑎᓐᓂᖅ ᐅᖃᐅᔾᔨᒋᐊᖅᑎᐅᓗᓂ ᑐᑭᓯᓂᐊᖅᑎᐅᓗᓂᓘᓐᓃᑦ, ᐃᖅᑲᓇᐃᔭᖅᑎᐅᒍᓂᓘᓐᓃᑦ.
ᐃᖅᑲᓇᐃᔭᖅᑏᑦ ᓇᓗᓇᐃᖅᓯᒋᐊᓖᑦ ᓯᓚᑖᓂ ᐱᓇᓱᐊᕐᓂᕐᒧᑦ ᐊᐅᓚᓂᕆᔭᒥᓐᓂᒃ ᑕᒪᓐᓇ ᐊᑑᑎᓂᖓᓂ ᐊᒻᒪᓗ ᑭᓪᓕᖃᖅᑎᑦᓯᒋᐊᖃᖅᓱᑎᒃ ᑕᖅᑳᓂ ᐱᓇᓱᐊᕐᓂᕐᒧᑦ ᐊᐅᓚᓂᐅᔪᓄᑦ ᐊᑑᑎᑲᓪᓚᖁᓇᒋᑦ ᐊᐳᖅᓯᒪᓂᕐᒥᒃ ᐅᕝᕙᓗ ᐊᓯᖏᓐᓂᒃ ᓯᖁᒥᑦᓯᓂᐅᔪᓂᒃ ᐊᑐᐃᓐᓇᐳᑎᑕᐅᔪᓂᒃ ᒪᓕᒐᕐᒧᑦ. ᑕᐃᒪᐃᓕᖓᒐᓗᐊᖅᑎᓪᓗᒋᑦ ᓯᓚᑖᓂ ᐱᓇᓱᐊᓂᕐᒧᑦ ᐊᐅᓚᓂᐅᔪᑦ, ᐃᖅᑲᓇᐃᔭᖅᑏᑦ ᐊᑲᐅᓂᖅᐹᒃᑯᑦ ᐱᔨᑦᓯᕆᐊᓖᑦ ᓄᓇᕗᒻᒥ ᐱᕙᓪᓕᐊᑎᓯᓂᕐᒧᑦ ᑯᐊᐳᕇᓴᒃᑯᓐᓂᒃ.
ᓇᐅᑐᐃᓐᓇᖅ ᐃᖅᑲᓇᐃᔭᖅᑎ ᑲᑎᒪᔨᓘᓐᓃᑦ ᑎᒍᒥᐊᕆᐊᖃᓐᖏᑦᑐᖅ ᓇᒻᒥᓂᖅ ᐱᔪᒪᔭᕆᔭᒥᓂᒃ, ᑐᕋᐃᓐᓇᖅᑐᒥᒃ ᑐᕋᐃᓐᓇᖏᑦᑐᒥᓪᓘᓐᓃᑦ ᓇᒻᒥᓂᖅ ᐃᓚᒥᑎᒍᑦ, ᐱᖃᓐᓇᕆᔭᒥᑎᒍᑦ ᐅᕝᕙᓗ ᑲᑐᔾᔨᖃᑎᒥᑎᒍᑦ ᐅᕝᕙᓘᓐᓃᑦ ᐊᖏᕐᓗᓂ ᐊᐅᓚᑦᓯᔨᐅᓂᕐᒧᑦ ᑲᑎᒪᔨᐅᓂᕐᒧᓪᓘᓐᓃᑦ ᑎᒥᐅᔪᒧᑦ ᐃᖅᑲᓇᐃᔮᒥᑎᒍᑦ ᓄᓇᕗᒻᒥ ᐱᕙᓪᓕᐊᑎᑦᓯᕐᓂᕐᒧᑦ ᑯᐊᐳᕇᓴᒃᑯᓐᓂ ᑲᑎᒪᔨ ᐃᖅᑲᓇᐃᔭᖅᑎᓘᓐᓃᑦ ᐱᕚᓪᓕᕈᑎᑦᓴᖃᕈᓂ ᑎᒥᐅᔪᒥᒃ ᐊᑦᑐᐃᓂᖃᕐᓂᒃᑯᑦ ᖃᓄᖅᑑᕈᑎᖏᓐᓂᒃ ᑯᐊᐳᕇᓴᒃᑯᑦ.
ᑲᓐᖑᓇᖅᑐᑦ ᑐᓴᕋᑦᓴᐃᑦ
ᑲᑎᒪᔨ ᐃᖅᑲᓇᐃᔭᖅᑎᓘᓐᓃᑦ ᖃᖓᓕᒫᑦᓯᐊᖅ ᑲᓐᖑᓇᖅᑐᓂᒃ ᑲᓐᖑᓇᖅᑑᑎᑦᓯᒋᐊᓕᒃ ᑐᓴᕋᑦᓴᓕᒫᓂᒃ ᑎᑎᕋᖅᑕᐅᓯᒪᔪᓂᓪᓗ ᓄᓇᕗᒻᒥ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕇᓴᒃᑯᓐᓂ ᐊᑐᕆᐊᖃᕋᑎᓪᓗ ᑐᓴᖅᑕᐅᑎᑦᓯᒋᐊᖃᕋᑎᓪᓗ ᑲᓐᖑᓇᖅᑐᓂᒃ ᑎᑎᕋᖅᑕᐅᓯᒪᔪᓂᓪᓘᓐᓃᑦ ᐃᖅᑲᓇᐃᔮᒥᓂᒃ ᑲᒪᓐᖏᑐᐊᕈᑎᒃ ᐅᕝᕙᓗ ᑎᑎᕋᖅᑕᐅᓯᒪᔪᑦ ᑐᓴᕋᑦᓴᐃᓪᓘᓐᓃᑦ ᑕᖅᑲᐅᖓ ᑐᓴᐅᒪᔭᐅᓕᖅᐸᑕ.
ᑕᐃᒫᑦᓴᐃᓐᓇᖅ, ᑲᑎᒪᔩᑦ ᐃᖅᑲᓇᐃᔭᖅᑏᓪᓗ ᐊᑐᕆᐊᖃᓐᖏᑦᑐᑦ ᑲᓐᖑᓇᖅᑐᓂᒃ ᑐᓴᕋᑦᓴᓂᒃ ᐱᔭᐅᓯᒪᔪᓂᒃ ᑲᑐᔾᔨᖃᑎᒌᒻᒥᑎᒍᑦ ᐅᕝᕙᓗ ᐃᖅᑲᓇᐃᔮᒥᑎᒍᑦ ᓄᓇᕗᒻᒥ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕇᓴᒃᑯᓐᓂ ᐱᕚᓪᓕᕈᑎᒋᒋᐊᒃᑲᓐᓂᕐᓗᒋᑦ ᓇᒻᒥᓂᖅ ᐱᔪᒪᔭᕆᔭᒥᓄᑦ ᐅᕝᕙᓗ ᐱᔪᒪᔭᕆᔭᖏᓐᓄᑦ ᐱᖃᓐᓇᕆᔭᖏᑦᑕ ᓇᒻᒥᓂᖏᑦᑕᓗ.
ᑲᑎᒪᔨ ᐃᖅᑲᓇᐃᔭᖅᑎᓘᓐᓃᑦ ᐊᑐᖅᑐᖅ ᓄᓇᕗᒻᒥ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕇᓴᒃᑯᑦ ᑲᑎᖅᓱᖅᓯᒪᔭᖏᓐᓂᒃ ᖃᕆᑕᐅᔭᒃᑯᑦ ᐅᕝᕙᓗ ᑎᑎᖅᑲᐅᓯᐊᓂᒃ ᖃᕆᑕᐅᔭᒃᑯᑦ ᓂᕆᐅᒋᔭᐅᓂᐊᖅᑐᑦ ᒪᓕᓐᓂᐊᕆᐊᖏᑦ ᐃᓗᐊᓂ ᐊᑐᐊᒐᕐᓂᒃ ᐊᐅᓚᓂᐅᔪᓂᓪᓗ ᖃᐅᔨᒪᓕᑕᐅᕙᖅᑐᑦ ᑐᖅᑯᐃᓯᒪᓂᕐᒧᑦ, ᐊᑐᕐᓂᕐᒧᑦ ᐊᐅᓪᓛᑎᑦᓯᓂᕐᒧᓪᓗ ᑐᓴᕋᑦᓴᓂᒃ ᑕᕝᕘᓇ.
Outside Employment
ᑯᐊᐳᕇᓴᒃᑯᑦ ᐃᖅᑲᓇᐃᔭᖅᑎᖏᑦ ᐊᓯᖏᓐᓂᒃ ᓯᓚᑖᓂ ᐃᖅᑲᓇᐃᔮᖃᕈᓐᓇᖅᑐᑦ ᐃᓚᐅᑎᓪᓗᑎᓪᓘᓐᓃᑦ ᓇᒻᒥᓂᖅ ᐱᕕᖃᕐᓂᕆᔭᒥᓐᓂᒃ, ᓇᒻᒥᓂᖅ ᐃᖅᑲᓇᐃᔭᐅᑎᒥᓂᒃ ᐊᑐᕐᓗᑎᒃ ᐊᑦᑐᐃᓂᖃᓐᖏᑦᑐᒃᑯᓪᓗ ᐃᖅᑲᓇᐃᔭᕐᓂᖏᓐᓂᒃ ᐊᐅᓚᓂᕆᔭᖏᓐᓂᓪᓗ ᑯᐊᐳᕇᓴᒃᑯᓐᓂ.
ᑭᓯᐊᓂ ᐃᖅᑲᓇᐃᔭᖅᑎᒥᒃ ᐊᖏᖅᑐᖃᕆᐊᖃᓐᖏᑦᑐᖅ ᐱᓕᐅᑎᖃᑎᖏᓐᓂ ᐅᕝᕙᓗ ᓇᐅᑐᐃᓐᓇᕐᒥ ᑎᒥᐅᔪᒥ ᐊᐳᖅᓯᒪᓂᕐᒧᑦ ᑎᑭᐅᑎᒍᑕᐅᑐᐃᓐᓇᕆᐊᓕᒻᒥ ᐅᕝᕙᓗ ᓈᒻᒪᓈᓐᖏᑦᑐᒥᒃ ᑯᐊᐳᕇᓴᒃᑯᑦ ᐱᔪᒪᔭᕆᔭᖏᓐᓄᑦ.
ᓱᐃᓛᕐᓂᖅ, ᐊᐃᑦᑑᓯᐊᕐᓂᖅ ᐊᒻᒪᓗ ᐱᕚᓪᓕᕈᑎᑦᓴᐃᑦ
ᐅᖃᖃᑎᒌᓐᓂᐅᔪᒥ, “ᐊᐃᑦᑑᓯᐊᑦ ᐱᕚᓪᓕᕈᑎᑦᓴᐃᓪᓘᓐᓃᑦ” ᐱᖃᐅᓯᔾᔨᔪᑦ ᑮᓇᐅᔭᓂᒃ, ᐃᔨᖅᓯᒪᔪᓂ ᑮᓇᐅᔭᓕᐊᓂᒃ ᐊᒻᒪᓗ ᓇᐅᑐᐃᓐᓇᐃᑦ ᐊᓯᖏᑦ ᐱᕚᓪᓕᕈᑎᑦᓴᐃᑦ ᑕᖏᖃᖅᐸᑕ, ᑕᖏᖃᓐᖏᐸᑕᓘᓐᓃᑦ ᓲᕐᓗ ᖃᖓᑦᑕᐅᑏᑦ, ᑐᔪᕐᒥᐅᑏᑦ ᒪᓂᒪᑎᑕᐅᔪᓪᓘᓐᓃᑦ ᐱᔨᑦᓯᕋᐅᑏᑦ ᐊᑭᑭᓕᒋᐊᖅᓯᒪᔪᑦ.
ᐊᑑᑎᖃᓪᓚᕆᑦᑐᖅ ᑲᔪᓯᑦᓯᐊᖅᑐᓄᑦ ᐱᓇᓱᐊᕐᓂᕐᒧᑦ ᐊᐅᓚᓂᐅᔪᒧᑦ ᑭᓇᒃᑯᓕᒫᑦ ᐱᓇᓱᐊᖃᑎᖃᖅᐸᑦᑐᑦ ᑯᐊᐳᕇᓴᒃᑯᓐᓂᒃ, ᑳᑦᑐᓛᑦᑎᐅᓗᑎᒃ ᓂᐅᕕᖅᑎᐅᓗᑎᓪᓘᓐᓃᑦ, ᐊᑐᐃᓐᓇᖃᕈᓐᓇᕆᐊᓖᑦ ᑯᐊᐳᕇᓴᒃᑯᓐᓂᒃ ᐊᔾᔨᒌᓪᓗᐊᒥᒃ.
ᑲᑎᒪᔩᑦ ᐃᖅᑲᓇᐃᔭᖅᑏ ᑲᑐᔾᔨᖃᑎᖏᓪᓗ ᐊᖏᕆᐊᖃᓐᖏᑦᑐᑦ ᓱᐃᓛᕿᒍᑎᓂᒃ, ᐊᐃᑦᑑᓯᐊᓂᒃ ᐅᕝᕙᓗ ᐱᕚᓪᓕᕈᑎᑦᓴᓂᒃ ᑕᑯᑦᓴᐅᑎᑦᓯᔪᓂᒃ ᐊᔾᔨᐅᖏᑦᑐᒥᒃ ᐱᐅᓯᖃᕐᕕᐅᓂᕐᒥᒃ ᑳᑦᑐᓛᑦᑎᐅᑐᐃᓐᓇᕆᐊᓕᒻᒧᑦ ᑲᑦᑐᓛᑦᑎᒧᓪᓘᓐᓃᑦ ᑯᐊᐳᕇᓴᒃᑯᓐᓄᑦ. ᓇᑐᐃᓐᓇᖅ ᑎᒥᐅᔪᖅ ᒪᓂᒪᑎᑦᓯᔪᖅ ᑕᐃᒪᐃᖃᑦᑕᕆᐊᖃᓐᖏᑦᑐᖅ; ᐱᓇᓱᐊᕐᓂᕐᒧᑦ ᑲᓲᒪᓂᐅᔪᑦ ᑯᐊᐳᕇᓴᒃᑯᓐᓄᑦ ᒪᓕᒐᖃᕐᓂᐊᖅᑐᑦ ᒪᓕᓪᓗᑎᓪᓗ ᑖᑦᓱᒪᓐᖓᑦ ᒪᓕᒋᐊᓕᒻᒥᒃ.
ᑕᐃᒫᑦᓴᐃᓐᓇᒐᓚᒃ, ᓇᐅᑐᐃᓐᓇᖅ ᑲᑎᒪᔨ ᐃᖅᑲᓇᐃᔭᖅᑎᓘᓐᓃᑦ ᒪᓂᒪᑎᑦᓯᒋᐊᖃᓐᖏᑦᑐᖅ ᓱᐃᓛᕿᒍᑎᓂᒃ, ᐊᐃᑦᑑᑎᓂᒃ ᐱᕚᓪᓕᕈᑎᑦᓴᓂᓪᓘᓐᓃᑦ ᐊᑦᓱᖐᒍᑕᐅᓗᑎᒃ ᐊᔾᔨᐅᓐᖏᑦᑐᒥᒃ ᐱᐅᓯᖃᕐᕕᖃᕐᓂᕐᒥᒃ ᑯᐊᐳᕇᓴᒃᑯᓐᓄᑦ.
ᓈᒻᒪᓈᖅᓯᒪᓐᖏᑦᑐᑦ ᐊᐃᑦᑑᑏᑦ ᐱᔭᐅᔪᑦ ᑲᑎᒪᔨᒧᑦ ᐃᖅᑲᓇᐃᔭᖅᑎᒧᓪᓘᓐᓃᑦ ᐅᑎᖅᑎᑕᐅᓂᐊᖅᑐᑦ ᐊᐃᑦᑐᐃᔪᒧᑦ ᐃᓚᖃᕐᓗᑎᒃ ᒪᓕᒐᕐᓂᒃ ᑕᕝᕗᖓᖓᔪᓂᒃ.
ᐃᓗᓕᕆᔭᐅᔪᑦ ᖃᐅᔨᒪᓕᑕᑦᓴᑎᑦ ᖃᓄᖅᑑᕈᑎᖃᖅᑎᓪᓗᑎᑦ ᐱᑎᑕᐅᓂᕐᒥᒃ ᐅᑎᖅᑎᑦᓯᓂᕐᒥᓪᓗ ᐊᐃᑦᑑᓯᐊᓂᒃ ᐱᖃᓯᐅᔾᔨᔪᑦ ᐅᑯᓇᓐᖓᑦ:
- ᐊᑭᓪᓕᐊᖏᑦ ᑕᐅᖅᓰᒍᑕᐅᔫᑉ ᐅᖓᑖᓅᕆᐊᖃᓐᖏᑦᑐᑦ $250
- ᑕᐅᖅᓰᓂᐅᔪᖅ ᓴᖅᑭᕈᑕᐅᒋᐊᖃᓐᖏᑦᑐᖅ ᑐᓂᒪᓂᕐᒧᑦ ᒫᓐᓇ ᓯᕗᓂᑦᓴᒥᓘᓐᓃᑦ.
- ᑕᐅᖅᓰᓂᐅᔪᖅ ᐊᖅᑭᑦᑕᐅᓯᒪᒋᐊᓕᒃ ᐃᓅᑉ ᐊᑭᓕᖅᑐᕆᐊᓕᖏᓐᓄᑦ ᑐᑦᓯᕋᐅᑎᓂ ᐃᖅᑲᓇᐃᔭᖅᑎ ᑲᑎᒪᓘᓐᓃᑦ ᒪᓂᒪᑎᑦᓯᖔᖅᐸᑦ ᐱᑎᑕᐅᓐᖏᖔᕐᓗᓂ.
ᐱᓇᓱᐊᕐᓂᒃᑯᑦ ᑲᓲᒪᖃᑎᖃᕐᓂᖅ ᑳᑦᑐᓛᑦᑎᓂᒃ
ᑯᐊᐳᕇᓴᒃᑯᑦ ᐱᐅᓯᖃᑦᓯᐊᕐᓂᐊᖅᑐᑦ ᒪᑐᐃᖔᕐᓗᑎᓪᓗ ᑳᑦᑐᓛᑦᑎᓕᒫᑦᓯᐊᓄᑦ ᐊᐅᓚᑦᓯᓂᐊᖅᓱᑎᓪᓗ ᐊᑐᐃᓐᓇᖃᖅᑎᑦᓯᓂᕐᒥᒃ ᐱᓇᓱᐊᕐᕕᒻᒥᓄᑦ ᑎᒥᐅᔪᓕᒫᓄᑦ ᑎᑭᐅᑎᓯᒪᓚᐅᖅᐸᑕ ᐱᐅᓂᕐᒨᖓᔪᑦ, ᓱᖏᖅᑑᑎᑦᓴᐅᔪᓄᑦ ᐊᒻᒪᓗ ᐱᓕᕋᐅᑎᒍᓐᓇᑦᓯᐊᕐᓂᖏᓐᓄᑦ.
ᒐᕙᒪᒃᑯᑦ ᓄᓇᕗᒻᒥ ᓄᓇᕗᒻᒥ ᓇᒻᒥᓂᖃᖅᑐᓂᒃ ᐃᑲᔫᑏᑦ ᐊᑐᐊᒐᖓᑦ (NNI) ᐊᒻᒪᓗ ᑯᐊᐳᕇᓴᒃᑯᑦ ᑳᑦᑐᓛᑦᑎᑦᓯᓂᕐᒧᑦ ᐊᑐᐊᒐᖓᑦ ᐊᑑᑎᔪᑦ ᐃᓘᓐᓇᖏᓐᓄᑦ ᑳᑦᑐᓛᓐᓂᕐᒧᑦ ᐊᐅᓚᓂᐅᔪᓄᑦ, ᑎᒥᖁᑎᖏᓐᓄᑦ, ᐊᕕᑦᑐᖅᓯᒪᓂᖏᓐᓄᓪᓗ.
ᐊᕙᑎ ᐊᑦᑕᓇᑦᑕᐃᓕᒪᓂᕐᓗ
ᐊᕙᑎᒥᒃ ᓴᐳᔾᔨᓂᖅ ᑐᓐᖓᕕᓪᓚᕆᐅᔪᖅ ᓄᓇᕗᒻᒥ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕇᓴᒃᑯᑦ ᐊᑐᖅᑐᖁᑎᖏᓐᓄᑦ; ᑲᑎᒪᔨᓕᒫᑦ ᐃᖅᑲᓇᐃᔭᖅᑎᓕᒫᓪᓗ ᑲᒪᒋᖃᔭᖅᑐᑦ ᖃᐅᔨᑦᓴᓯᐊᕐᓂᕐᒧᑦ ᑯᐊᐳᕇᓴᒃᑯᑦ ᐊᐅᓚᓂᖏᓐᓂᒃ ᒪᓕᒐᓗᐊᕐᒪᖔᑕ ᐊᕙᑎᒧᑦ ᒪᓕᒐᕐᔪᐊᓂ ᑎᑭᐅᒪᒋᐊᓕᓐᓂᓪᓗ.
ᐊᑦᑕᓇᑦᑐᐃᓕᒪᓂᖅ ᑭᓇᒃᑯᓕᒫᓄᑦ ᐃᓱᒫᓘᑕᐅᒋᐊᓕᒃ. ᑯᐊᐳᕇᓴᒃᑯᑦ ᑐᓂᒪᓂᖃᕐᒪᑕ ᐊᑐᐃᓐᓇᐅᑎᑦᓯᓂᕐᒧᑦ ᐃᖅᑲᓇᐃᔭᖅᑎᓕᒫᓄᑦ ᐊᑦᑕᓇᓐᖏᑦᑐᒥᒃ, ᖃᓄᐃᓐᖏᑦᑐᒥᒃ ᐸᕝᕕᓴᑦᑕᐅᓂᖃᓐᖏᑦᑐᒥᒃ ᐃᖅᑲᓇᐃᔭᕐᕕᒻᒥᒃ ᐱᐅᓯᐅᔪᓂᒃ ᒪᓕᒐᕐᓂᓪᓗ.
ᐊᐅᓚᑦᓯᔩᑦ ᑲᑎᒪᔩᓪᓗ ᑕᒪᕐᒥᒃ ᒪᓕᒐᖅᑎᒍᑦ ᑎᒍᒥᐊᖅᑐᑦ ᐊᑦᑕᓇᑦᑕᐃᓕᒪᓂᕐᒥᒃ ᓴᐳᔾᔭᐅᓂᖓᓂᓪᓗ ᐊᕙᑎᐅᑉ ᐊᒻᒪᓗ ᐊᑐᓂᑦ ᐊᐅᓚᑦᓯᔩᑦ ᓇᓗᓇᐃᖅᓯᒪᔪᓂᒃ ᑐᓂᒪᓂᖃᖅᑐᑦ ᑕᕝᕗᖓᖓᔪᓂᒃ.
ᐃᖅᑲᓇᐃᔭᖅᑎᓕᒫᑦ ᑐᓂᒪᓂᖃᖅᑐᑦ ᐅᔾᔨᖅᑐᑦᓯᐊᕆᐊᖃᕐᓂᕐᒥᒃ ᐃᓘᓐᓇᑦᓯᐊᖏᓐᓂ ᐊᐅᓚᓂᐅᔪᑦ, ᓇᒻᒥᓂᖅ ᐊᑦᑕᓇᖅᑐᕐᒨᖅᑎᑦᑕᐃᓕᑐᐃᓐᓇᖏᓪᓗᓂ, ᑭᓯᐊᓂᑦᑕᐅᖅ ᐊᑑᑎᑦᑕᐃᓕᓗᓂ ᓴᖅᑮᕐᓂᕐᒥᒃ ᐅᓗᕆᐊᓇᖅᑐᓂᒃ ᐊᓯᒥᓄᑦ ᐅᕝᕙᓘᓐᓃᑦ ᑕᑯᑦᓴᐅᑎᑦᓯᓂᕐᒥᒃ ᐱᐅᓯᐅᔪᓂᒃ ᑕᑯᓐᓇᖅᑕᐅᒍᓐᓇᖅᑐᓂᒃ ᐊᔾᔨᐅᑎᑦᓯᖏᓐᓂᕐᒥᒃ ᐸᕝᕕᓴᓐᓂᕐᒥᓪᓘᓐᓃᑦ.
ᐊᑐᕐᓂᖅ ᑯᐊᐳᕇᓴᒃᑯᑦ ᐱᖁᑎᖏᓐᓂᒃ
ᑯᐊᐳᕇᓴᒃᑯᑦ ᐱᖁᑎᖏᑦ ᐊᑐᖅᑕᐅᓂᕐᓗᒋᐊᖃᓐᖏᑦᑐᑦ ᐃᒻᒥᓅᖓᔪᓄᑦ ᑲᑎᒪᔨᓄᑦ ᐃᖅᑲᓇᐃᔭᖅᑎᓄᓪᓗ.
ᑲᑎᒪᔩᑦ ᐃᖅᑲᓇᐃᔭᖅᑏᓪᓗ ᓱᓕᔪᕐᓇᖅᑐᖁᑎᒋᔭᐅᒻᒪᑕ ᐸᐸᑦᓯᓂᐊᖅᑎᓪᓗᒋᑦ, ᐊᐅᓚᑦᓯᓗᑎᒃ, ᐊᑭᑐᓗᐊᓐᖏᑦᑐᓂᓪᓗ ᐊᑐᕐᓂᐊᕆᐊᖏᑦ ᑯᐊᐳᕇᓴᒃᑯᑦ ᐱᖁᑎᖏᓐᓂᒃ ᐊᒻᒪᓗ ᐊᓚᒡᒐᐃᑦᑐᒥᒃ ᐊᑐᓗᐊᕆᐊᖃᓐᖏᑦᑐᖅ ᐃᖅᑲᓇᐃᔭᐅᑎᓂᒃ ᓇᒻᒥᓂᖅ ᐱᕚᓪᓕᕈᑎᒋᓗᒋᑦ ᐃᒻᒥᓅᖓᑎᓪᓗᒋᓪᓘᓐᓃᑦ.
ᑲᑎᒪᔩᑦ ᐃᖅᑲᓇᐃᔭᖅᑏᓪᓗ ᖃᐅᔨᑦᓴᓯᐊᕆᐊᓖᑦ ᑯᐊᐳᕇᓴᒃᑯᓐᓄᑦ ᐱᖁᑎᒋᔭᐅᔪᑦ ᑐᓂᔭᐅᓯᒪᔪᑦ ᐸᐸᑕᐅᑦᓯᐊᕆᐊᖃᕐᒪᑕ ᑭᐅᔾᔪᑎᖃᕈᓐᓇᕆᐊᖃᖅᓱᑎᓪᓗ ᐱᖁᑎᒋᔭᐅᔪᓅᖓᔪᓂᒃ.
ᑲᑎᒪᔩᑦ ᐃᖅᑲᓇᐃᔭᖅᑏᓪᓗ ᓴᒃᑯᐃᒋᐊᖃᓐᖏᑦᑐᖅ ᑯᐊᐳᕇᓴᒃᑯᑦ ᐱᖁᑎᖏᓐᓂᒃ ᐋᒡᒐᐅᒐᓗᐊᖅ ᑐᓐᖓᕕᖃᕐᓗᑎᒃ ᑯᐊᐳᕇᓴᒃᑯᑦ ᐱᒻᒪᕆᐅᑎᓂᒃ ᐱᖁᑎᓂᒃ ᐊᐅᓚᑦᓯᓂᕐᒧᑦ ᐊᑐᐊᒐᖓᓐᓂᒃ.
ᐱᔪᓐᓇᐅᑏᑦ ᖃᐅᔨᔭᐅᔪᓪᓗ
ᐃᖅᑲᓇᐃᔭᖅᑏᑦ ᐃᓚᐅᑎᒐᔪᒻᒪᑕ ᐊᔾᔨᒌᓐᖏᑦᑐᓄᑦ ᖃᐅᔨᓴᓂᕐᒧᑦ ᐊᑲᐃᓪᓕᐅᕈᑕᐅᔪᓂᓪᓘᓐᓃᑦ ᖃᓄᖅᑑᕈᑎᖃᕐᓂᕐᒥᒃ ᑯᐊᐳᕇᓴᒃᑯᓐᓄᑦ. ᓴᖅᑭᖅᑐᖅ ᐱᓇᓱᐊᕐᓂᖓᑕ ᐃᓗᐊᓐᓂᒃ ᐃᖅᑲᓇᐃᔮᒥᑎᒍᑦ ᐱᒋᔭᐅᔪᖅ ᓄᓇᕗᒻᒥ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕇᓴᒃᑯᓐᓄᑦ ᑲᒪᒋᔭᐅᔪᖅ ᐃᓱᓕᑦᓯᓂᖅᐸᑦ ᐃᖅᑲᓇᐃᔭᕐᕕᒻᒥ ᐃᖅᑲᓇᐃᔭᕐᕕᐅᖏᑦᑐᒥᓘᓐᓃᑦ.
ᑖᒃᑯᐊ ᐃᓗᓕᕆᔭᖏᑦ ᐱᖃᓯᐅᔾᔨᔪᑦ ᑖᒃᑯᑑᓐᖏᒃᑲᓗᐊᖅᓱᑎᒃ ᖃᐅᔨᒪᔭᕆᐊᑦᑎᒍᑦ ᐊᐅᓚᓂᐅᔪᑦ, ᐋᖅᑭᑦᑕᐅᓯᒪᔪᓂᒃ ᑕᐅᑦᑐᕐᓂᒃ, ᐊᒥᓱᓕᐅᕈᑦᓴᓂᒃ ᐃᓂᓕᐅᖅᓯᒪᔪᓂᒃᔭ ᐅᓂᒃᑳᓂᓪᓗ ᑎᑎᕋᖅᑕᐅᓯᒪᔪᓂᒃ ᐊᓯᖏᓐᓂᓪᓗ ᐱᕙᓪᓕᐊᓯᒪᔪᓂᒃ.
ᐱᔪᓐᓇᐅᑏᑦ ᐃᔾᔪᐊᖅᑕᐅᔾᔭᐃᒃᑯᑏᓪᓘᓐᓃᑦ, ᓈᒻᒪᓈᕐᓂᖓᒍᑦ, ᑎᓂᔭᐅᒋᐊᓖᑦ ᐃᖅᑲᓇᐃᔭᖅᑎᓄᑦ ᑯᐊᐳᕇᓴᒃᑯᓐᓄᑦ.
ᑲᑎᒪᔨᓄᑦ ᐃᓚᐅᑎᓐᓂᖅ
ᑲᑎᒪᔩᑦ ᐃᖅᑲᓇᐃᔭᖅᑏᓪᓗ ᑎᓕᐅᖅᑕᐅᕗᑦ ᐃᓚᐅᑎᑦᓯᐊᖁᓪᓗᒋᑦ ᓇᒻᒥᓂᖅ ᓄᓇᓕᓕᐅᓪᓗᑎᒃ ᐃᓱᒪᖅᓱᕐᓇᖅᑐᒃᑯᑦ ᐊᐅᓚᓂᒃᑯᑦ ᓇᓪᓕᑐᐃᓐᓇᖏᓐᓂ ᖁᑦᓯᓕᕇᓐᓂᐅᔪᓂ ᐱᖃᓯᐅᑎᑦᓱᓂ ᓂᕈᐊᕋᑦᓴᐅᓂᖅ ᑕᖅᑲᐅᖓ ᑲᑎᒪᔨᓄᑦ.
ᑭᓯᐊᓂᓕ ᑲᑎᒪᔩᑦ ᐃᖅᑲᓇᐃᔭᖅᑏᓪᓗ ᐃᓚᒋᔭᐅᔪᑦ ᑲᑎᒪᔨᓅᖓᔪᓄᑦ ᐊᐅᓚᓂᐅᔪᓄᑦ ᓇᒻᒥᓂᖅ ᐱᕕᖃᕐᓂᕐᒥᓂᒃ ᐊᑐᖃᑦᑕᕆᐊᓖᑦ ᐃᑉᐱᒍᓱᑦᓯᐊᕆᐊᖃᖅᓱᑎᓪᓗ ᐃᒻᒥᒃᑰᖓᑎᑦᓯᒋᐊᖃᕐᓂᕐᒥᒃ ᓇᒻᒥᓂᖅ ᐱᔪᒪᔭᕆᒥᓂᒃ ᑲᑐᔾᔨᖃᑎᒌᓂᒃ ᑯᐊᐳᕇᓴᒃᑯᓐᓂᓪᓗ.
ᑎᒍᒥᐊᕐᓂᖅ
ᑯᐊᐳᕇᓴᒃᑯᑦ ᓇᓗᓇᐃᖅᓯᓯᒪᔪᑦ ᐱᐅᓯᖃᕐᓂᐊᕆᐊᑦᓴᖅ ᐊᒻᒪᓗ ᑕᑯᓐᓇᖅᑕᐅᓂᐊᕆᐊᑦᓴᖅ ᒪᓕᒐᖃᑦᓯᐊᖅᑐᓂᒃ ᑯᐊᐳᕇᓴᐅᓂᕐᒥᒃ. ᐊᑐᓂᑦ ᑲᑎᒪᔩᑦ ᐃᖅᑲᓇᐃᔭᖅᑏᓪᓗ ᒪᓕᑦᓯᐊᕆᐊᓖᑦ ᑎᑭᐅᒪᔭᕆᐊᓕᓐᓂᒃ ᓇᓗᓇᐃᖅᑕᐅᓯᒪᔪᓂᑦ ᐊᑦᑐᐊᔪᓂ ᐊᑐᐊᒐᕐᓂ, ᒪᓕᒐᕐᓂ ᒪᓕᒐᖅᔪᐊᒥᓘᓐᓃᑦ.
ᐃᖅᑲᓇᐃᔭᖅᑎᒥᒃ ᒪᓕᑦᓯᐊᖅᑐᖃᓂᖏᑉᐸᑦ ᑖᒃᑯᓇᓐᖓᑦ ᑎᑭᐅᒪᔭᕆᐊᓕᓐᓂᒃ ᖃᓄᐃᑕᐅᒋᐊᕈᑎᒋᒍᓐᓇᖅᑕᖓ ᑎᑭᐅᑎᒍᓐᓇᖅᓱᓂ ᐊᕕᑕᐅᓂᕐᒧᑦ.
ᑲᑎᒪᔨᖏᑦ ᒪᓕᓐᖏᑦᑐᖃᕐᓂᖅᐸᑦ ᑖᒃᑯᓇᓐᖓᑦ ᑎᑭᐅᒪᔭᕆᐊᓕᓐᓂᒃ ᐃᓱᒪᓕᐅᑕᐅᒍᓐᓇᖅᑐᑦ ᐲᖅᑕᐅᖁᔭᐅᓗᓂ ᐊᓪᓚᕕᒻᒥᒃ.
ᑕᑯᑦᓴᐅᑎᑦᓯᒍᑕᐅᓗᓂ ᑲᑦᓱᖓᐃᓐᓂᕆᔭᑦᑎᓐᓂᒃ ᑐᓂᒪᓂᑦᑎᓂᓪᓗ ᑕᒪᑦᓱᒧᖓ ᑲᑎᒪᔨᖏᑦ ᓄᓇᕗᒻᒥ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕇᓴᒃᑯᑦ, ᑎᒥᖁᖏᑦ, ᐊᓪᓚᕕᒻᒪᕆᒻᒥ ᐃᖅᑲᓇᐃᔭᖅᑎᖏᑦ, ᓂᐅᕕᐊᑦᓴᓕᕆᔨᒻᒪᕇᑦ ᐊᒻᒪᓗ ᑎᒥᖁᑎᒋᔭᐅᔪᓂᒃ ᐊᐅᓚᑦᓯᔨᒻᒪᕇᑦ ᐊᑎᓕᐅᕆᐊᓖᑦ ᓇᓗᓇᐃᖅᓯᔾᔪᑎᒥᒃ ᑐᖅᑯᕐᓗᒍᓗ ᑯᐊᐳᕇᓴᒃᑯᑦ ᐊᓪᓚᑎᒻᒪᕆᖓᓐᓄᑦ.
ᓱᓕᓂᖅ, ᓱᓕᔪᕐᓇᕐᓂᖅ ᒪᑐᐃᖔᕐᓂᕐᓗ ᐊᑦᑐᐊᓂᖃᓪᓚᕆᑦᑐᑦ ᐊᑑᑎᑲᖃᕐᓂᖏᓐᓄᑦ ᐱᓇᓱᐊᕐᓂᒃᑯᑦ ᑲᔪᓯᑦᓯᐊᕐᓂᑦᑕ. ᓇᐅᑐᐃᓐᓇᖅ ᑲᑎᒪᔨ ᐃᖅᑲᓇᐃᔭᖅᑎᓘᓐᓃᑦ ᖃᐅᔨᒪᔪᖅ ᑲᖐᓱᑦᑐᕐᓘᓐᓃᑦ ᑖᓐᓇ ᒪᓕᒐᖅ ᓯᖁᒥᑕᐅᓯᒪᒋᐊᖓ ᓯᖁᒥᑕᐅᑐᐃᓐᓇᕆᐊᖃᕐᓂᖓᓂᓪᓘᓐᓃᑦ ᐅᖃᐅᓯᖃᕆᐊᖃᕐᓂᕐᒥᒃ ᑎᒍᒥᐊᖅᑐᖅ.
ᓇᒧᑦ ᑐᑭᓯᒋᐊᕐᕕᑦᓴᐅᕙ
ᑲᑎᒪᔩᑦ ᐃᖅᑲᓇᐃᔭᖅᑏᓪᓘᓐᓃᑦ ᐅᖃᐅᔾᔭᐅᒋᐊᕆᐊᓖᑦ ᓇᓪᓕᑐᐃᓐᓇᖏᓐᓄᑦ ᒪᓕᒐᐃᑦ ᐅᕝᕙᓗ ᑲᖏᓲᒍᑎᒃ ᓈᒻᒪᓐᖏᑦᑐᓂᒃ ᐊᐅᓚᓂᐅᔪᓂᒃ ᑐᑭᓯᒋᐊᒃᑲᓐᓂᕆᐊᓕᒃ ᐱᐅᓯᐅᒋᐊᓕᓐᓄᑦ ᐅᖃᐅᔾᔨᒋᐊᖅᑎᒧᑦ.
ᖃᐅᔨᒃᑲᐃᓂᐅᔪᓕᒫᑦ ᐱᐅᓯᐅᒋᐊᓕᓐᓄᑦ ᐅᖃᐅᔾᔨᒋᐊᖅᑎᒧᑦ ᑲᓐᖑᓇᖅᑑᑎᑕᐅᓪᓚᕆᓐᓂᐊᖅᑐᑦ ᐋᒡᒐᐅᒐᓗᐊᖅ, ᐃᓱᒪᒋᔭᖓᑎᒍᑦ ᐅᖃᐅᔾᔨᒋᐊᖅᑎᐅᑉ, ᐋᒡᒐᐅᒐᓗᐊᖅ ᐅᖃᐅᓯᐅᔪᖅ ᑕᑯᑦᓴᐅᑎᑦᓯᑉᐸᑦ ᐅᓗᕆᐊᓇᖅᑐᒥᒃ ᓄᓇᕗᒻᒥ ᐱᕙᓪᓕᐊᑎᑦᓯᕐᓂᒧᑦ ᑯᐊᐳᕇᓴᒃᑯᓐᓄᑦ, ᐃᖅᑲᓇᐃᔭᖅᑎᖏᓐᓄᑦ, ᑭᒡᒐᖅᑐᐃᔨᖏᓐᓄᑦ ᐅᕝᕙᓘᓐᓃᑦ ᐃᓄᓐᓄᑦ ᑕᖅᑲᐅᖓ.
