ᑮᓇᐅᔾᔭᒃᓴᖏᓐᓂᖅᓴᐃᑦ
ᐱᓕᕆᐊᖑᔪᓄᑦ ᑮᓇᐅᔭᓕᐅᕐᓂᑭᓐᓂᖅᓴᓄᑦ ᓄᓇᕗᑦ ᐱᕙᓪᓕᐊᔪᓕᕆᔨᒃᑯᖏᑕ ᑯᐊᐳᕇᓴᓐᖓ ᓇᖕᒥᓂᖃᖃᑕᐅᕗᖅ 51 % ᑐᖔᓂ. ᐃᓚᖏᓐᓂᒃ ᑮᓇᐅᔾᔭᖃᑕᐅᔾᔪᑎᒋᔭᕗᑦ ᐅᑯᐊᖑᕗᑦ:
ᐅᑭᐅᖅᑕᖅᑐᒥ ᐃᒪᕐᒥᐅᑕᓕᕆᔩᑦ $250,000 (ᕿᑭᖅᑕᕐᔪᐊᕐᒥ) ᐅᑭᐅᖅᑕᖅᑐᒥ ᐃᒪᕐᒥᐅᑕᓕᕆᔨᒃᑯᑦ ᑎᓴᒪᓂᒃ ᐊᖑᓇᓱᒃᑐᓕᕆᔨᒃᑯᑦ ᑲᑐᔾᔨᖃᑎᒌᖏᓐᓂ ᐱᓕᕆᖃᑕᐅᕗᑦ:
- ᓇᑦᑎᕙᒃ ᐊᖑᓇᓱᒃᑐᓕᕆᔨᒃᑯᑦ – ᕿᑭᖅᑕᕐᔪᐊᖅᒥᑦ
- ᐃᕕᖅ ᐊᖑᓇᓱᒃᑐᓕᕆᔨᒃᑯᑦ– ᐊᐅᓱᐃᑦᑐᕐᒥ
- ᐃᑲᖅᔪᑎᑦ ᐊᖑᓇᓱᒃᑐᓕᕆᔨᒃᑯᑦ – ᐃᒃᐱᐊᕐᔪᖕᓂ
- ᖃᐅᓱᐃᑦᑐᕐᒥ ᐊᖑᓇᓱᒃᑐᓕᕆᔨᒃᑯᑦ – ᖃᐅᓱᐃᑦᑐᕐᒥ
ᓱᕙᒃ ᐊᖏᑎᒋᔪᖅ 100 ft.-ᓂᒃ ᐊᑐᖅᑕᐅᓪᓗᓂ, ᐅᑭᐅᖅᑕᖅᑐᒥ ᐃᒪᕐᒥᐅᑕᓕᕆᔨᒃᑯᓐᓂᒃ ᖃᓕᕋᓕᒐᓱᒃᑎᓪᓗᒋᑦ ᐃᖃᓪᓕᐊᕐᕕᐅᕙᒃᑐᒥ 0A-ᒥᒃ 0B-ᒥᒡᓗ.
ᐸᖕᓂᖅᑑᕐᒥ ᐃᖃᓗᓕᕆᔩᑦ (ᐸᖕᓂᖅᑑᖅ)
ᐃᖃᓗᓕᕆᕕᖓ ᐸᖕᓂᖅᑑᕐᒦᑦᑐᖅ, ᕿᑭᖅᑕᓃᑦᑐᖅ ᐃᓄᓕᒃ 1300-ᖏᓐᓃᓪᓗᐊᖅᑐᓂ ᐊᒻᒪᓗ 8−ᓂᒃ ᐃᖅᑲᓇᐃᔭᖅᑎᖃᖅᑐᑦ 30-ᓂᒡᓗ ᐃᖅᑲᓇᐃᔭᖅᑎᖃᓕᕈᓐᓇᖅᑐᑦ ᐃᓛᓐᓂᒃᑯᑦ. ᓯᑎᐱᕆ 1992-ᒥ, ᑲᖏᖅᑐᐊᓗᖕᒥ ᐃᖃᓗᖕᓂᐊᖅᑏᑦ ᓄᓇᕗᑦ ᐱᕙᓪᓕᐊᔪᓕᕆᔨᒃᑯᑦ ᑯᐊᐳᕇᓴᓐᖓᓗ ᑲᑐᔾᔨᖃᑎᒌᓕᓚᐅᖅᐳᑦ ᐋᖅᑭᒋᐊᖁᓪᓗᒋᑦ ᐃᖃᓗᒐᓱᒃᑏᓪᓗ ᐊᐅᓚᑦᑎᐊᖁᓪᓗᒋᑦ.
ᓴᓇᔭᐅᔪᖃᓚᐅᖅᐳᖅ ᓄᑖᖑᓂᖅᓴᕐᒥᒃ ᐃᖃᓗᓕᕆᕕᖕᒥ ᖃᓕᕋᓖᑦ ᐃᖃᓗᐃᓪᓗ ᑰᑕᖏᓐᓂᒃ ᐱᓕᕆᖁᓪᓗᒋᑦ ᓇᓃᓐᓂᖓ ᑕᑯᓗᒍ. ᐃᖃᓗᓕᕆᕕᒃ ᐃᖃᓪᓕᐊᖅᑎᓂᒃ ᖃᓕᕋᓕᒐᓱᒃᑎᓂᒡᓗ ᐃᑲᔪᖅᐳᑦ ᓂᐅᕕᖃᑦᑕᕐᓂᖏᓐᓄ. ᐃᖃᓗᓕᕆᕕᒡᓗ ᖃᓕᕋᓕᓕᕆᑎᑦᑎᖃᑦᑕᖅᐳᑦ ᑕᕆᐅᕐᒥᙶᖅᑐᓂᒃ. ᐱᔭᐅᔪᑦ, ᐃᓗᐃᑦᑑᓲᖑᕗᑦ ᓵᑦᑑᔭᒐᒃᓴᐅᓪᓗᑎᒡᓘᓐᓃᑦ, ᓄᓇᕗᒻᒥ, ᑲᓇᑕᒥ ᑕᕆᐅᓪᓗ ᐊᑭᐊᓂ ᖃᐅᔨᒪᔭᐅᑦᑎᐊᖅᑐᓄᑦ ᑐᓂᔭᐅᓲᓄᑦ.
ᓱᓪᓕᒃᑯᑦ $375,000 (ᓴᓪᓖᑦ)
ᓱᓪᓕᒃᑯᑦ ᐱᖃᑕᐅᕗᑦ ᐃᖏᕐᕋᔪᓕᕆᔪᓂᒃ, ᓴᓇᔭᐅᓯᒪᔪᓂᒃ, ᐳᓚᕋᑦᑐᓕᕆᔪᓂᒡᓗ ᓴᓪᓕᓂᑦ. ᑲᒻᐸᓂᐅᔪᖅ ᐊᐅᓚᑦᑎᖃᑕᐅᑦᑎᐊᓚᐅᖅᐳᑦ ᒐᕙᒪᒃᑯᑦ- ᐅᖅᓱᐊᓗᓕᕆᔨᒃᑯᖏᓐᓂᒃ ᐅᖅᓱᐊᓗᓕᕆᖃᑕᐅᓚᐅᖅᐳᑦ ᓴᓪᓕᓂᑦ 1986-ᒥᑦ 2011-ᒧᑦ. ᓱᓪᓕᒃᑯᑦ 30 ᐅᖓᑖᓂ ᐊᕐᕋᐅᒍᓂᒃ ᓴᓇᔭᐅᔪᕐᔪᐊᓂᒃ ᓴᓪᓕᓂ ᐱᓕᕆᖃᑕᐅᓯᒪᓕᖅᐳᑦ. ᐅᒥᐊᕐᔪᐊᖅᑕᐅᒑᖓᒥᒃ ᐅᓯᑲᖅᑕᖅᑐᓕᕆᓯᒪᕗᑦ ᐊᐳᑕᐃᔭᐃᕙᒃᖢᑎᒡᓗ ᓄᓇᓕᖏᓐᓂ. 2010-ᒥᑦ, ᓱᓪᓕᒃᑯᑦ ᕘᔅ ᐃᐅᒃᑯᓐᓂ ᑳᓐᑐᕌᒃᑖᖅᑎᑕᐅᓚᐅᖅᐳᑦ ᐊᐅᓪᓚᕐᓂᐊᖅᑐᓂᒃ ᑲᒪᖁᓪᓗᒋᑦ. ᓱᓪᓕᒃᑯᑦ ᐃᖅᑲᓇᐃᔭᖅᑎᖃᖅᓯᒪᕗᑦ 70-ᖏᓐᓃᓗᐊᖅᑐᓂᒃ ᓄᓇᓕᖓᓂ ᓇᖕᒥᓂᖃᖅᑏᑦ ᐱᓕᕆᓂᖅᐹᖑᓕᕌᖓᒥᒃ.
ᑐᑯᒫᒃᑯᑦ $ 475,000 (ᑲᖏᖅᑐᒑᐱᖕᒥ)
ᑐᑯᒫᒃᑯᑦ ᑐᔪᕐᒥᕕᖃᖅᑎᑦᑎᔪᓐᓇᖅᑐᑦ 8-ᓂᒃ ᓴᓇᔭᐅᕋᑖᖅᑐᖅ ᑲᖏᖅᑐᒑᐱᖕᒥᑦ. ᑐᑯᒫᒃᑯᑦ ᐱᐅᓂᖅᐹᓂᒃ ᑐᔪᕐᒥᕕᖃᕈᒪᕗᑦ ᐊᖏᒡᓕᕙᓪᓕᐊᓂᖅᑕᖃᖁᓪᓗᒍ ᐃᓕᓴᖅᓯᕕᒃᑯᓪᓗ ᑐᕌᕈᑎᒋᔪᒪᔭᖓᓂᒃ ᐃᑲᔪᕈᒪᓪᓗᑎᒃ. ᓄᓇᓕᖓᓐᓄᑦ ᐅᑎᖅᑎᑦᑎᔪᒪᓂᖏᓐᓄ ᐃᖅᑲᓇᐃᔮᒃᓴᖃᖁᔨᓪᓗᑎᒡᓗ.
